गडचिरोली | प्रतिनिधी | ७ ऑगस्ट २०२६
सामाजिक न्याय व विशेष सहाय्य विभागांतर्गत राबविण्यात येणाऱ्या भारतरत्न डॉ. बाबासाहेब आंबेडकर स्वाधार योजनेअंतर्गत सन २०२६-२७ या शैक्षणिक वर्षासाठी अनुसूचित जाती व नवबौद्ध प्रवर्गातील पात्र विद्यार्थ्यांनी नूतनीकरण (Renewal) अर्ज १५ सप्टेंबर २०२६ पर्यंत ऑनलाइन सादर करावेत, असे आवाहन सहाय्यक आयुक्त, समाज कल्याण, गडचिरोली यांनी केले आहे.
या योजनेचा यापूर्वी लाभ घेतलेल्या विद्यार्थ्यांनी नूतनीकरणासाठी आवश्यक कागदपत्रे अद्ययावत करून निर्धारित मुदतीत अर्ज सादर करणे बंधनकारक आहे. अंतिम मुदतीनंतर प्राप्त होणाऱ्या अर्जांचा कोणताही विचार केला जाणार नसल्याचे समाज कल्याण विभागाने स्पष्ट केले आहे.
विद्यार्थ्यांनी HMAS पोर्टलवर जाऊन ऑनलाइन पद्धतीने अर्ज भरावा. अर्ज भरताना सर्व माहिती अचूक नमूद करून आवश्यक कागदपत्रे अपलोड करावीत. अर्ज अंतिम स्वरूपात सादर करण्यापूर्वी माहितीची पडताळणी करण्याचेही आवाहन करण्यात आले आहे.
ऑनलाइन अर्ज करताना कोणतीही अडचण आल्यास विद्यार्थ्यांनी सहाय्यक आयुक्त, समाज कल्याण, गडचिरोली कार्यालयाशी संपर्क साधावा, असेही विभागाने कळविले आहे.