गडचिरोलीतील 2,539 शेतकऱ्यांना ₹11.74 कोटींच्या कर्जमाफीचा लाभ; आधार प्रमाणीकरण अनिवार्य

गडचिरोली | प्रतिनिधी | Info News Update 24

गडचिरोली, दि. २७ जुलै : राज्य शासनाच्या ‘पुण्यश्लोक अहिल्यादेवी होळकर शेतकरी कर्जमुक्ती योजना-2026′ अंतर्गत गडचिरोली जिल्ह्यातील पात्र शेतकऱ्यांच्या याद्या जाहीर करण्यात आल्या असून, पहिल्या टप्प्यात 2,539 शेतकरी पात्र ठरले आहेत. या शेतकऱ्यांना एकूण ₹11 कोटी 74 लाख 66 हजार इतक्या कर्जमाफीचा लाभ मिळणार आहे.

शासनाकडून प्राप्त झालेल्या पात्र लाभार्थ्यांच्या याद्या 25 जुलै 2026 रोजी जिल्हा उपनिबंधक, सहकारी संस्था कार्यालय, सहाय्यक निबंधक कार्यालय, जिल्हा मध्यवर्ती सहकारी बँक, प्राथमिक कृषी पतपुरवठा सहकारी संस्था तसेच गावपातळीवर प्रसिद्ध करण्यात आल्या आहेत.

ही योजना पूर्णपणे ऑनलाइन आणि आधार क्रमांकावर आधारित असून, पात्र कर्ज खात्यांची माहिती संबंधित बँकांनी शासनाच्या पोर्टलवर अपलोड केली आहे. गडचिरोली जिल्हा मध्यवर्ती सहकारी बँकेने 2,926 पात्र कर्ज खात्यांची माहिती शासनाकडे सादर केली होती. त्यानंतर शासनाने पात्र लाभार्थ्यांची अंतिम यादी जाहीर केली.

आधार किंवा बायोमेट्रिक प्रमाणीकरण आवश्यक

योजनेचा प्रत्यक्ष लाभ मिळण्यासाठी पात्र शेतकऱ्यांनी आपल्या कर्ज खात्याचे बायोमेट्रिक किंवा आधार प्रमाणीकरण करणे अनिवार्य आहे. प्रमाणीकरण पूर्ण झाल्यानंतरच संबंधित शेतकऱ्यांच्या खात्यावर कर्जमाफीची प्रक्रिया पूर्ण होणार आहे.

जिल्हाधिकाऱ्यांनी पात्र लाभार्थ्यांना आवाहन केले आहे की, कोणताही विलंब न करता आपल्या जवळच्या ‘आपले सरकार सेवा केंद्र’ किंवा संबंधित बँक शाखेत जाऊन आधार अथवा बायोमेट्रिक प्रमाणीकरण पूर्ण करावे, जेणेकरून कर्जमाफीचा लाभ वेळेत मिळू शकेल.

मान्यवरांची उपस्थिती

यादी प्रसिद्ध करण्याच्या कार्यक्रमाला जिल्हा उपनिबंधक (सहकारी संस्था) श्री. मुकुंद मेश्राम, अधीक्षक श्री. लोमेश रंधये, गडचिरोली जिल्हा मध्यवर्ती सहकारी बँकेचे मुख्य कार्यकारी अधिकारी श्री. सतीश आयलवार, कर्ज विभागाचे सरव्यवस्थापक श्री. राजू सोरते, उपसरव्यवस्थापक श्री. चंद्रशेखर तोटावर, संबंधित संस्थांचे व्यवस्थापक तसेच ग्रामस्थ उपस्थित होते.

महत्त्वाचे मुद्दे