एटापल्ली-जांबिया-मोडस्के रस्त्याची तातडीने दुरुस्ती करा; आदिवासी विकास परिषदचे निवेदन

एटापल्ली, दि. 11 ऑगस्ट 2026 : एटापल्ली तालुक्यातील जांबिया–मोडस्के या महत्त्वाच्या रस्त्याची अत्यंत दुरवस्था झाली असून, तातडीने दुरुस्ती व आवश्यक बांधकाम करण्यात यावे, अशी मागणी अखिल भारतीय आदिवासी विकास परिषद, एटापल्लीच्या वतीने करण्यात आली आहे.

या संदर्भात परिषदेच्या पदाधिकाऱ्यांनी सार्वजनिक बांधकाम विभाग, एटापल्ली येथील उपविभागीय अभियंत्यांना निवेदन सादर केले. निवेदनात या रस्त्यावर मोठमोठे दगड, खड्डे तसेच पावसाळ्यात नाले व पाण्याच्या प्रवाहामुळे निर्माण होणाऱ्या समस्यांकडे प्रशासनाचे लक्ष वेधण्यात आले आहे.

परिषदेच्या म्हणण्यानुसार, जांबिया–मोडस्के रस्ता हा एटापल्ली तालुक्यातील अतिदुर्गम व दुर्गम भागाला जोडणारा महत्त्वाचा मार्ग आहे. मात्र अनेक वर्षांपासून रस्त्याची योग्य देखभाल न झाल्याने नागरिकांना मोठ्या अडचणींचा सामना करावा लागत आहे. रस्त्यावर ठिकठिकाणी मोठमोठे खड्डे पडले असून, पावसाळ्यात पाण्याचा प्रवाह वाढल्याने काही ठिकाणी वाहतूक विस्कळीत होण्याची शक्यता निर्माण होते.

विशेषतः एखाद्या नागरिकास अचानक आजारपण किंवा वैद्यकीय आपत्कालीन परिस्थिती निर्माण झाल्यास त्याला रुग्णालयात नेणे अत्यंत कठीण होते, अशी बाब निवेदनात नमूद करण्यात आली आहे. त्यामुळे रस्त्याची दुरुस्ती हा केवळ वाहतुकीचा प्रश्न नसून नागरिकांच्या जीवित, आरोग्य आणि सुरक्षिततेशी संबंधित गंभीर विषय असल्याचे परिषदेकडून सांगण्यात आले.

सात प्रमुख मागण्या

निवेदनाद्वारे प्रशासनाकडे पुढील मागण्या करण्यात आल्या आहेत—

जांबिया–मोडस्के रस्त्याची तातडीने प्रत्यक्ष पाहणी करून मोठे दगड, अडथळे व माती हटवावी.
रस्त्यावरील सर्व धोकादायक खड्डे बुजवून तातडीने दुरुस्ती करावी.
पावसाळ्यात नाल्यांमुळे व पाण्याच्या प्रवाहामुळे संपर्क तुटणाऱ्या ठिकाणी मोऱ्या, पुलिया व पाण्याचा निचरा करण्याची कायमस्वरूपी व्यवस्था करावी.
रस्त्याचे आवश्यकतेनुसार मजबुतीकरण व कायमस्वरूपी बांधकाम करावे.
पावसाळ्यात नागरिकांची वाहतूक सुरक्षित राहण्यासाठी तात्पुरत्या स्वरूपात आवश्यक दुरुस्ती व प्रतिबंधात्मक उपाययोजना कराव्यात.
दोन्ही रस्त्यांची तांत्रिक पाहणी करून आवश्यक निधी व प्रशासकीय/तांत्रिक मंजुरीची कार्यवाही करावी.
भविष्यात रस्त्याच्या दुरवस्थेमुळे अपघात, जीवितहानी किंवा नागरिकांच्या आरोग्यास धोका निर्माण होऊ नये यासाठी प्रतिबंधात्मक उपाययोजना कराव्यात.

निवेदनात प्रशासनाच्या निदर्शनास आणून देण्यात आले आहे की, आवश्यक दुरुस्ती व प्रतिबंधात्मक उपाययोजना वेळेत न झाल्यास अपघात किंवा जीवितहानी झाल्यास संबंधित विभागाची जबाबदारी निश्चित करण्यात यावी.

नागरिकांच्या जीवितास, आरोग्यास आणि सुरक्षिततेस प्राधान्य देत जांबिया–मोडस्के रस्त्याची तातडीने पाहणी करून दुरुस्तीची कामे सुरू करावीत, अशी मागणी निवेदनातून करण्यात आली आहे.

निवेदनावर गिरीश जोगे (युवा तालुकाध्यक्ष, एटापल्ली), adv. राजेश तोरे (युवा प्रदेश सचिव), मारोती बरसागडे (जनहितवादी समिती), स्वप्नील मडावी (सोशल मीडिया प्रमुख) तसेच इतर पदाधिकाऱ्यांच्या स्वाक्षऱ्या आहेत. निवेदनाची प्रत जिल्हाधिकारी, गडचिरोली; मुख्य कार्यकारी अधिकारी, जिल्हा परिषद; उपविभागीय अधिकारी, एटापल्ली आणि गटविकास अधिकारी, पंचायत समिती एटापल्ली यांना देण्यात आली आहे.